Bungal

Nabungi si Faith kanina. Actually nung isang araw pa dapat, eh ang kaso, hirap akong bunutin gamit ang sinulid, kaya na-extend hanggang kanina. Hindi ko na matandaan kung pang-ilang bungi na niya ito, pero nung huli siyang mabungi, siya na mismo ang nagbunot. Na nalaman ko na lang nang kumatok siya sa kuwarto ko at bumungad ng, "Tatay binunot ko na ipin ko!" habang hawak-hawak ito.

Koleksiyon

At tulad ng nakagawian namin, kinuha ko ang ipin niya at nilagay sa isang container ng holen at mga coins na nakolekta ko mula sa ibang bansa. Walang supernatural, historical or emotional na value ang mga holen at ang mga banyagang coins. Yung mga holen nabili ko sa tyangge. Yung mga coins sinadya kong kolektahin. Dun ko lang talaga pinagpasyahang ilagay ang mga ipin nilang nabubungi kasi dun ko gusto.

Noong bata ako, ang ginagawa ng lola Toryana ko ay ihahagis niya ang nabungi na ipin sa bubong ng lumang bahay naming may atip na gawa sa cogon. Na sasabayan niya ng isang kataga. Hindi ko na ma-recall, pero parang may kinalaman sa daga na kukunin ang ipin, at papalitan ng bago. Ewan ko rin kung ba't daga. Wala namang concept ng Mickey Mouse ang barrio namin noon kasi wala pang telebisyon. Siguro dahil matibay ang ipin ng mga daga na kilalang ngumangatngat sa mga nakaimbak na palay ni tatang doon sa kamalig.

Nung nasa CLSU-Family dorm kami, at unang mabungi ang Elmo, ang ginawa ng lola Bing niya ay ihinagis rin sa bubong (na gawa sa yero) ang ipin ng bata. Nainis ako noon. Kasi malaki ang pagpapahalaga ko sa ipin ng aking panganay, gaya ng pagpapahalaga ko sa kanyang unang ginupit na buhok, unang ginupit na kuko.

Kaya buhat noon, nagpasabi na ako in advance na, "Wawows, sa susunod na mabungi ka kokolektahin na natin ha?" Kaya ayun. Nagsimula nga kaming mangulekta. May dalawang ipin si Elmo na hindi napasama sa koleksyon kasi pinaglaruan at naiwalis bago pa man lang maitago.

Wala naman extraordinary sa kanilang mga pagkakabungi (walang lindol, unos o bulalakaw na lumlabas, halimbawa), liban na lang nung isang taon nang natutulog si Elmo at bigla siyang gumising at may idinura. Kinaumagahan, na-shock siya ng malamang nawawala ang isa niyang ipin. Yun na pala yung idinura niya kinagabihan.

Dentista

Dahil alaga ang mga ipin ng bata, hindi sila nag-develop ng tooth decays sa front teeth, liban na lamang sa molars ni Elmo na nadiskubre namin nitong taon lang. Nung bata ako, hindi ganito ang sitwasyon ko. Maselan ako noon sa ulam at parati kong ibinabahog sa kanin ang asukal, Alaska condensed milk, o kaya naman ay yung nirarasyon na KLIM sa mga barrio. For that sira-sira ang ipin ko nung bata ako.

Nang mag-develop ako ng tooth decay nung elementary una kong naranasan ang magpabunot sa dentista. Hindi ko na kasi matiis ang sakit lalo na sa gabi. Nasubukan ko na rin ang lahat ng solusyon. Magmumog ng maligamgam na tubig na may asin, bawang, pinakuluang talbos ng bayabas. At dahil sawang-sawa na ang teacher ko sa excuse kong masakit ang ipin kapag umaabsent, napilitan ang lolo ko na dalhin ako sa dentista at pabunutan. Hindi naman morbid. Ang ganda nga nung dentista eh, mabango siya, saka magaan ang kamay niya.

Kaya nang hindi na maranasan ni Elmo ang mga naranasan ko, kinonvince ko agad siyang pumunta sa Dentista.

"Masakit!", sabi niya.

"Hindi!" pilit ko. "Magaling yung dentista mo!"

"Sino?"

"Si ______," yung ka-batch ko nung high school ako. "Sabi nga niya may discount kayo eh."

Si jowa, "Hay naku wag na lang! Sa ibang dentista na lang!"

Ewan ko ba sa kanya. Mula nang i-kwento kong naging crush ako ni ________ nung 1st year hanggang 2nd year high school, nagbago na ang tingin niya sa mga babaeng dentista. Kaya naman nang magpalinis ako ng ipin, kinaray niya ako dun sa male dentist sa kanilang university.

Sign Comment Here

Date:	16-July-2008
Name:	patadyong
Website:	http://modernpatadyong.i.ph
Message:	haha. bungal nga. ang kyut naman ng post na to. w/c reminds me pf my tradi ways before. yung sinulid method ba. ah about the close circles, matagal ko ng gustong magcomment dito, pero nakakaintimidate yung "abs" mo :D
	buti pinaalala mo, ang unang attempt ko pala ng bunot sa ipin ni Faith ay gumamit ako ng sinulid. Ni revise ko na ang opening. Nung bata ako, sinubukan ko rin yan, tapos yung kabilang dulo ng sinulid nasa pinto, na isasarang bigla ng kapatid ko. kaso sablay, ang sakit nun. ayan nag-comment ka na. todo pigil kaya ako sa hininga jan nang maemphasize ang muscles ng aking abs. :D

Date:	16-July-2008
Name:	chad
Message:	Hahaha! panalo kuya jun! Naalala ko tuloy nung bata pa ko sinuhulan ako ng palabok at halo-halo ng nanay ko para pumayag akong magpabunot ng ngipin (masakit pa nun ngipin ko ha.) Hayun pagkatapos naming kumain tumuloy na kami sa dentista upang pabunot ko ang pung-pong na mga ngipin. Nung makita ko sa salamin kung panu himihiyaw ung nauna sakin...charan! shaks ayoko na sabi ko sa nanay ko.Ayaw ko tlga! still, pinipilit parin ako ni nanay! Ginawa ko hinubad ko mga damit ko para ikahiya ako ni nanay!hahaha!effective naman at inuwi ako and take note sikat pa ko!
	iskandaloso ko pala. ako nung binunutan ako, may nauna na sa aking mama, as in mama. kitang-kita ko nung binubunot na, napapaangat talaga yung mama sa upuan niya at napapahawak sa kamay ng dentista. di ko nga alam kung pano kong na-survive yon. siguro dahil panay ang ngiti sa akin nung dentista. charing.

Sign Comment Here